“Recursos Educativos en acción: presentación de novidades”
Venres 21 Novembro ás 16:00 horas
- Sesión Matemáticas: Creagal de matemáticas
Relatora: Mª Jesús Casado Barrio - Sesión Interdisciplinar: Conexións na Educación Científica: transferencia da universidade a secundaria
Relatora: Yolanda Golías Pérez - Sesión Bioloxía e Xeoloxía: Creagal de Bioloxía e Xeoloxía de 1ºESO
Relatora: María Serramito Calo - Sesión Interdisciplinar: Plataforma Ágora Dixital
Relator: José Manuel Viñas Diéguez
SOBRE OS RELATORES
Mª JESÚS CASADO BARRIO
Catedrática de matemáticas de secundaria, con destino no IES Francisco Daviña Rey (Monforte), actualmente é asesora da Consellería de Educación, Ciencia, Universidades e Formación Profesional e coordina o grupo de elaboradores de matemáticas de secundaria do proxecto cREAgal.
Docente desde o ano 1989, é membro da Asociación Galega do Profesorado de Educación matemática (AGAPEMA) desde a súa creación. Impartiu numerosos cursos e charlas sobre a súa materia, o currículo, e a aplicación das TIC na docencia das matemáticas, así como o traballo por proxectos. Xunto con outros docentes recibíu un premio a nivel nacional e outro a nivel galego con proxectos vinculados a esta materia.
Respecto ao proxecto cREAgal: Trátase dun proxecto da Consellería de Educación que consiste na creación de REAS con situacións de aprendizaxe nas que se traballa o currículo galego das materias de 5º e 6º de primaria e os catro cursos de secundaria. Iniciouse en 2024 e na actualidade ten cubertas
aproximadamente a metade das materias deses cursos no repositorio de contidos educativos da Consellería de Educación (https://espazoabalar.edu.xunta.gal/creagal). Espérase telas todas no ano 2027. As situacións, creadas en eXeLearning, están feitas por profesorado galego, conteñen actividades editables, accesibles e modificables. Todas con licenza CC-BY-NC-SA.
Máis información na web do proxecto (https://espazoabalar.edu.xunta.gal/creagal).
YOLANDA GOLÍAS PÉREZ
Coordinadora da Unidade de Divulgación Científica e Cultural da Universidade da Coruña, doutora en Didáctica das Ciencias Experimentais, licenciada en Química e técnica superior en Educación e Control Ambiental. Con máis de vinte anos de experiencia en educación científica, iniciouse nos Museos Científicos Coruñeses, onde desenvolveu obradoiros e proxectos europeos e internacionais. Centrou o seu labor en adaptar contidos complexos a distintos niveis educativos mediante a experimentación e a aprendizaxe activa. Nos últimos cinco anos coordinou o Itinerario de Ciencias Experimentais no Mestrado de Profesorado, promovendo a transferencia efectiva de coñecemento entre a universidade e a secundaria
MARÍA SERRAMITO CALO
Profesora de Bioloxía e Xeoloxía desde 2018 na educación pública en Galicia, é na actualidade profesora no IES Plurilingüe Rosalía de Castro, de Santiago de Compostela.
Participou no grupo de traballo da elaboración dos currículos oficiais de Galicia e das exemplificacións de programacións didácticas en Proens de todas as materias da área de Bioloxía e Xeoloxía. Ademais, ten experiencia como asesora do Servizo de Ordenación Educativa na Consellería de Educación, Ciencia, Universidades e Formación Profesional no que se elaboraron os decretos oficiais de currículo e as ordes de desenvolvemento correspondentes. Neste servizo tamén se levou a cabo o deseño e actualización da aplicación Proens.
Participa no grupo de traballo de cREAgal de Bioloxía e Xeoloxía de 1ºESO, onde se fixo un deseño paralelo deste recurso educativo coa programación didáctica modelo de Proens.
JOSÉ MANUEL VIÑAS DIÉGUEZ
É profesor de Bioloxía e Xeoloxía no IES David Buján de Cambre (A Coruña) e asesor no Centro de Innovación Educativa e Dixital da Consellería de Educación. Realizou estadías formativas en Ottawa e San Francisco, onde se especializou en metodoloxía indagativa e ciencia cidadá. Participou en accións de formación con European Schoolnet, CEFIRE, Elhuyar, CENEAM e MediaLabPrado. Foi mentor en proxectos internacionais como WorldBiotech e Design Squad Global da ASTC e actualmente é embaixador do proxecto europeo Scientix.
Para saber máis: https://www.linkedin.com/in/josé-viñas-diéguez-b5621658