Prezadas compañeiras e compañeiros,
Os días 23, 24 e 25 de novembro de 2023 celebraremos o XXXVI Congreso de ENCIGA no IES LAGOA DE ANTELA de Xinzo de Limia, en Ourense.
A Limia atópase no centro da provincia, nesta vila houbo un tempo no que existiu unha LAGOA que dá nome ao noso centro, a Lagoa de Antela.
Na Limia poderedes atopar torres e castelos medievais, mosteiros e pobos reconstruídos, castros e minería antiga, natureza e paisaxe.
Tamén poderedes imaxinar o que foi a maior Lagoa da península Ibérica antes da súa seca (a partires do ano 1958), xa intentada polos Romanos que seguramente esqueceron o proxecto ante as dificultades e por que non… pola influenza do río Limia, si, o río do esquecemento, pois di a lenda que quen o cruza perde a memoria.
Ben certo é que non visitaredes Xinzo no seu momento álxido, o Entroido, que aquí non é un festivo…é un SENTIMENTO, pero teredes ocasión de visitar o museo do Entroido, o museo da Lagoa…
Como non, degustar a excelente gastronomía de Xinzo da Limia, así como gozar doutras posibilidades de ocio nun ambiente distendido, hospitalario e de boa camaradería.
Como en tódolos congresos de ENCIGA seguro que vos atopades con moitos compañeiros e compañeiras que vedes unha vez ao ano.
Temos a opción de participar en moitas actividades de debate e intercambio de experiencias, que mellorarán a nosa práctica docente.
Podemos expoñer aquela idea ou proxecto que non fixestes ata agora ou que xa levastes a cabo e queredes compartila.
E, como sempre, pensade que a forza de ENCIGA sodes todos vós, que coa vosa asistencia e colaboracións contribuídes a que congreso a congreso esta asociación pioneira siga en pé.
Por iso son tan importantes as vosas achegas: os relatorios, os obradoiros, os carteis e demais materiais; traballos sen os que isto non sería posible, e que pronto poderedes enviar.
Na páxina web de ENCIGA (www.enciga.org) estará á vosa disposición toda a información relativa ao formato, os prazos de presentación dos traballos e á formalización da vosa inscrición ao congreso.
Recibide un saúdo moi agarimoso dende o IES Lagoa de Antela, e en especial do equipo organizativo e colaborador que vos prepara a mellor das benvidas.
Os coordinadores do XXXVI Congreso de ENCIGA,
Ana Belén Martínez Álvarez
Miguel Ángel Yebra Ferro
