Congresos Enciga

Carta de presentación

Queridos compañeiros e compañeiras:

Continuando coa traxectoria iniciada en anos anteriores ENCIGA vai celebrar o seu XXV congreso. Nós, como organizadores, temos a honra de asumir con entusiasmo esta tarefa que aínda que é moi interesante non está exenta de traballos e dificultades.

Este congreso vai presentar novidades tanto nas datas coma na organización, pois celebraremos “as vodas de prata” e o bicentenario do nacemento do ilustre químico galego Antonio Casares. Terá lugar os días 22, 23 e 24 de novembro de 2012 e desenvolverase conxuntamente entre o IES Xelmírez I e a Facultade de Químicas da USC, sitos ambos no campus Sur da Universidade de Santiago de Compostela.

Xuntos uniremos forzas para que siga xirando a engrenaxe que mantén activa a nosa asociación. Por iso invitámosvos a ser pezas imprescindibles do congreso participando e compartindo os vosos traballos que poderedes enviar ao enderezo congreso25@enciga.org,  antes do luns 15 de outubro.

O formato de presentación dos traballos podedes atopalo na páxina web de ENCIGA, www.enciga.org, no apartado do congreso. Na mesma páxina poderedes facer a inscrición ao congreso.

Para non defraudarvos, despois de tantos éxitos anteriores e como compensación ao voso esforzo, poñeremos todo da nosa parte para ofrecervos as ledicias dunha fermosa cidade, o reencontro amigable con compañeiros e colegas e un amplo mostrario do que se está a traballar en didáctica das ciencias no noso país.

Un saúdo en nome do equipo coordenador.

Contidos do Congreso

Actividades

No congreso desenvolveranse as seguintes actividades:

• Conferencias
• Comunicacións
• Comunicacións en cartel
• Obradoiros
• Exposicións e mostra de materiais
• Debates
• Visitas e actos sociais

Temas

Os temas que suxerimos para a presentación de traballos, sen carácter excluínte, son:

• Experiencias didácticas
• Actividades de investigación-acción
• Experiencias interdisciplinares
• Tratamento de contidos transversais
• Avaliación
• Estratexias metodolóxicas
• Desenvolvemento curricular
• Materiais curriculares
• Recursos multimedia
• Aquel tema que prefiras, porque xamais sobrará o que nos queiras contar