A Asociación de Ensinantes de Ciencias de Galicia (ENCIGA) convoca o Premio á Investigación sobre a evolución histórica do Boletín das Ciencias (BdC), con motivo da celebración da publicación do seu exemplar número 100.
BASES
1ª.- OBXECTO. A convocatoria deste Premio ten por obxecto promover a análise da evolución do Boletín das Ciencias, publicación periódica da Asociación de Ensinantes de Ciencias de Galicia, ao longo dos seus trinta e sete anos de historia.
2ª.- PARTICIPANTES. Poderá participar na convocatoria calquera persoa maior de idade, de maneira individual ou compartindo autoría, podendo cada participante concursar cun único traballo. A presentación do traballo ao Premio non é incompatible coa presentación do mesmo como traballo académico.
3ª.- FORMATO. Os traballos deberán presentarse en pdf, estar redactados en galego, ter unha extensión comprendida entre 50 e 100 páxinas, formato A4, marxes de 2,5 cm, letra Arial 11 ou 12 e entreliñado de 1,5.
4ª. TIPOLOXÍA. Os traballos terán un enfoque e unha estrutura libre, se ben deberán facer un estudo pormenorizado da evolución histórica do Boletín das ciencias, desde o inicio ata a etapa actual. Suxírense como aspectos a contemplar, entre outros: ∙ Seccións nas que se estrutura
- Evolución das temáticas tratadas e números monográficos
- Inclusión da perspectiva de xénero
- Publicacións periódicas e boletíns-guía do congreso
- Autorías máis prolíficas
- Distribución das publicacións por áreas (Matemáticas, Ciencias Naturais, Física e Química, Interdisciplinares).
- Breve análise do enfoque didáctico por disciplina.
- Valoración do impacto educativo ou social da revista ou dos artigos. .
5ª.- ENVÍO DE TRABALLOS. As persoas participantes deberán enviar os traballos en formato dixital ao enderezo electrónico da asociación (secretaria@enciga.org) e en formato papel nun sobre dirixido á ASOCIACIÓN DE ENSINANTES DE CIENCIAS DE GALICIA (ENCIGA). PREMIO INVESTIGACIÓN EVOLUCIÓN HISTÓRICA BdC. Avda. Alfonso X O Sabio, s/n. 27002 – LUGO. En ambos casos deberá achegarse o artigo coa autoría oculta e nun documento separado, ou nun sobre pechado no interior, indicar a identificación completa do/a autor/a, co seu nome, o seu DNI e o seu enderezo electrónico e un teléfono de contacto (no caso de ser autoría compartida, debe figurar o nome de todas as persoas autoras).
6ª.- PRAZO. A data última para recepción de traballos será o día 30 de xuño de 2025. Esta data non será prorrogable a fin de que o traballo premiado sexa publicado como o número 100 do Boletín das Ciencias.
7ª.- XURADO. O xurado estará constituído por persoas socias de ENCIGA e será designado para tal fin pola Xunta Directiva da asociación.
8ª.- ASPECTOS A VALORAR. Para a concesión do premio, valoraranse criterios como a calidade na redacción, a metodoloxía empregada e o rigor analítico. 9ª.- PREMIO. Establécense dous premios: un 1º Premio dotado cunha contía económica de MIL EUROS (1.000 €) e un 2º Premio de SEISCENTOS EUROS (600 €). No caso de que os traballos premiados sexan de vario/as autores/as, a contía do premio será repartida entre eles/as. Ademais, o traballo que acade o 1º Premio será publicado pola asociación nun exemplar monográfico do Boletín das Ciencias. 10ª.- PUBLICACIÓN DA RESOLUCIÓN. A decisión do xurado farase pública antes de finalizar xullo de 2025, podéndose declarar desertos os premios.
11ª.-DEREITOS SOBRE O TRABALLO. ENCIGA resérvase o dereito sobre a difusión dos traballos premiados da maneira que estime máis oportuna, ademais da súa publicación no Boletín das Ciencias, sen prexuízo dos dereitos que lle asisten á persoa ou persoas autoras.
12ª.- ENTREGA DOS PREMIOS. A entrega dos Premios terá lugar nun acto público que terá lugar durante a celebración do XXXVIII Congreso de ENCIGA, comunicándoselle a data e a hora á persoa ou persoas premiadas coa suficiente antelación.
13ª.- ACEPTACIÓN DAS BASES. A participación na convocatoria do premio implica a aceptación das presentes bases que estarán publicadas na páxina web da asociación (www.enciga.org).
